PICPA padayong nag-una sa Wednesday Club caging

CEBU, Philippines - Miposte sa ilang ikaunom nga sunod-sunod nga daog ang Philippines Institute of Certified Public Accountants (PICPA)   human nila gipilde ang mas paboritong Bhutakalz, 93-86 sa second round of elimination sa Wednesday Club basketball tournament niadtong Miyerkules didto sa Capitol Parish gym sa dan Escario, ning siyudad.

Wala makaduwa si team owner Yoli Meso, apan ang gibakantihan niyang puwesto gisawo ni Kim Valenzuela, kinsa miiskor og 20 puntos gawas sa iyang daghang assists.

Hinuon, si Edlin Endrina nga miposa'g 30 puntos maoy topscorer sa PICPA ni coach Norwin Honoridez. Si Ryan Alejandre miamot og 11 puntos alang sa PICPA nga sayo kaayong mikontrolar sa duwa pinaagi sa ilang 26-17 sa first period.

Mi-rally unta ang Bhutakalz sa second period pinaagi sa pagpabuto og 27-21 run dihang nagbahis silang Van Ligutan ug Cris Ang aron mosikit ngadto sa tres puntos, 44-47 sa halftime.

Sila si Endrina ug Valenzuela nanginit sa final period aron kandadohan ang kadaugan.

Sa maong kadaugan ang PICPA padayon karong nag-una sa liderato bitbit ang 6-3 nga baraha.

Si Ligutan miburak og 27 puntos aron pangulohan ang Bhutakalz, samtang sila si Fermin Pepito ug Ang mitampo'g 20 ug 16 puntos matag usa.

PUNTOS MATAG USA

PICPA (93) - Endrina 30, Valenzuela 20, Alejandre 11, Flores 10, Talaroc 10, Bonsucan 8, Credo 4,

BHUTAKALZ (86) - Ligutan 27, Pepito 20, Ang 16, Alain 9, Arnaiz 9, Verallo 5 (BANAT SPORTS)