Dodie Boy Jr. moaway gawas Sugbu

CEBU, Philippines - Mobalik na sab og saka ibabaw sa ring ang Sugbuanong superbantamweight prospect nga si Dodie Boy Peñalosa Jr. uban ang paglaum nga mohimo og impresibong kadaugan batok ni South Korean fighter Jong Won Jung sa main event sa "Dugong Kampeon-Bakbakan sa Caloocan" sa Enero 28 didto sa Recome Dome sa Caloocan City.

Kini ang labing unang main event fight ni Dodie Boy Jr. gawas Sugbu.

Katapusan siyang midaog niadtong Oktubre sa miaging tuig batok ni Donriel Marcos pinaagi sa third round TKO didto sa Hoops Dome sa Lapu-Lapu City.

Ang anak ni former two-division champion Dodie Boy Sr. ug pag-umangkon ni Filipino ring legend ug karon usa na ka promoter nga si Gerry Peñalosa, moatubang sa ikaduha niyang langyaw nga kaatbang.

Ang 21-anyos nga boksidor unang miaway batok sa usa ka langyaw'ng boksidor niadtong Agosto sa miaging tuig batok ni Thai Kong Kiatpracha, kinsa napatumba sa round 3.

Si Peñalosa wala pay pilde sa iyang pito ka away, tanan niyang daog gikan sa knockout, apan ang iyang uyoan nga si Gerry mipasidaan nga dili sayon nga kontra si Jong kay nabantog kini nga lig-ong boksidor.

 "Koreans are known for their tough chin. We will see how Dodie Jr. will fare against his second foreign opponent," matud pa sa GerryPens Promotions big boss ngadto sa Philboxing.com.

Sa supporting bouts, ang undefeated nga si Marvin Mabait makigharong ni Rey Perez alang sa Philippine bantamweight title, samtang ang IBF Pan Pacific flyweight title-holder nga si Sonny Boy Jaro mosukod sa abilidad ni Jayson Rotoni.

Mokompleto sa undercard mao ang sangka nila ni Ren-Ren Tesori batok Baby Marfil ug Aldrin Guara batok Larry Ibara.   - BANAT NEWS