SWU, UV magtigi sa Dapa sa Surigao del Norte

CEBU, Philippines - Sa tinguha nga makatilaw og kampiyonato sa umaabot nga season sa Cebu Schools Athletic Foundation, Inc. (CESAFI), ang Southwestern University (SWU) Cobras mikuha og laing taga-Cameroon nga si Mbala Mendjana Benoit nga may gitas-on nga 6-foot-6 nga maoy ikatimbang ni Justin Aboude.

Sukdon ang katakus ni Benoit sa ilang sangka batok sa University of the Visayas (UV) Green Lancers nga pangulohan ni Wowie Escocio sa usa ka exhibition game didto sa Dapa Municipal gym sa Siargao island sa Surigao del Norte.

Si Escocio nga gikan sa Lyceum of the Philippines usa   sab ka dakung kubit alang sa UV Lancers ug andam na makigkumbati. Iyang tumong nga tabangan ang UV Lancers pagsakmit og balik sa korona sa CESAFI nga midailos sa ilang palad sa miaging duha ka tuig.

Niadtong 2010, napilde ang Lancers ngadto sa University of Cebu (UC) Webmasters aron maputol ang ilang siyam ka tuig nga pagdominar sa CESAFI. Sa miaging season, wala sila mo-abante sa finals sa labing unang higayon sa kasaysayan human sila gitagak sa Cobras.

Ang Cobras ug Lancers nilarga paingon sa Surigao niadtong miaging gabii ubos sa pagdapit Mayor Peter Ruaya aron paghatag og kalingawan sa mga molupyo ug ingon man molamas sa ilang tinuig nga kapistahan   karong Enero 12. 

Ang pagdapit sa duha ka basketball titans gipaagi ni Romy Cal, ang kanhi board member sa Surigao del Norte. Sakop na sab siya karon sa congressional staff ni Representative Francisco Matugar Sr. (BANAT NEWS)