MANILA, Philippines - Inangkin ng Boracay Rum ang playoff spot para sa puwesto sa quarterfinals nang durugin ang PC Gilmore, 71-41, sa PBA D-League Aspirants’ Cup kahapon sa San Juan Gym.
Nilimitahan ng Waves sa tatlong puntos ang Wizards sa huling 8 minuto sa second period.
Ang split ni Paolo Taha ang naglapit sa Wizards sa 17-15 bago rumatsada ng 21-3 palitan ang Waves para sa di na natinag na 38-18 kalamangan sa halftime.
Tinapos ng Waves ang laro sa eliminasyon tangan ang 5-5 karta at nakatiyak ng playoff sakaling magkatabla sila ng Café France (4-5) at RnW Pacific Pipes (4-5).
Unang nagpasikat ang Café France nang manaig sa DUB Unlimited, 85-77, para lumapit sa isang panalo patungo sa posibleng unang paglalaro sa post season sa dalawang taon sa liga.
Tinapos ng Wheelers ang laro bilang kulelat sa 11 koponang liga sa 1-9 baraha.