SutikeYama Resto Bar kampiyon Lapu-Lapu Mayor's Cup

CEBU, Philippines - Nakalingkawas gikan sa makutas nga duwa ang Sutike Yama Resto Bar pinaagi sa pagpukan sa Morning Gym, 67-65 aron langkaton ang korona sa Lapu-Lapu City Fiesta Mayor's Cup 2011 basketball tournament didto sa Hoops Dome sa nahisgutang dakbayan.

Ang Sutike Yama ni team owner Rolly dela Pieza ug coach Chucky Caro nabiyaan og tres puntos paghuman sa unang 10 minutos sa duwa sa iskor nga 15-18. Dali hinuon silang nakarekober sa sunod nga kuwarter sa kombinasyon nilang Adonis Morata, Allen Tarona ug Miguel Tabaloc nga pulos mihagdaw og double figures aron sakmiton ang momentum sa halftime, 33-32.

Nahimong kulbahinam ang aksiyon dihang ang duha ka kampo nagsinukliay og mga puntos, apan sa wala hibaw-i nga sa luyo sa kakugi sa Sutike Yama pinaagi sa mga ataki ug hugot nga depensa, ilang naangkon ang makahuloganong kadaugan.

Si Morata maoy topscorer sa Sutike Yama pinaagi sa iyang 19 puntos, gisundan ni Tarona nga adunay 17 puntos ug si Tabaloc miligwat og 12 puntos.

Ang naparot nga Morning Gym gipangulohan sab ni Minor, kinsa mitira og 20 puntos. Laing tulo niya ka teammates ang mirehistro sab og double figures.

Gipaluyohan ni Lapu-Lapu City Mayor Paz Radaza, ang kompetisyon, gipadagan ni city councilor Harry Radaza uban ni Larry Villanil.

puntos matag usa

SUTIKE YAMA (67) - Morata 19, Tarona 17, Tabaloc 12, Berido 6, Soroño 6, Resilla 4, Amistad 3

MORNING GYM (65) - Minor 20, Sala 14, Bongangciso 13, Montenegro 11, San Pablo 4, Bonghanoy 2, Sala 1 (BANAT NEWS)