MANILA, Philippines - Mga Sugbuanong players didto sa Manila nga dali kaayong mikulit og dungog, mopakita sa ilang abilidad sa Cebu Basketball Association (CBA) Christmas League nga sugdan karong Domingo, diha sa Cebu Coliseum.
Ang mga sakop sa UAAP Mythical Five nga si Jerie
Marion Pingoy, anak ni ex-Lancer Jerry Pingoy ug Roger Pogoy, moduwa alang sa Southwestern University (SWU) Cobras.
Ning maong torneyo, mas daku na og kahigayonan nga langkaton sa Cobras ang ilang unang major title ubos ni coach Raul 'Yayoy' Alcoseba human sila mapakyas sa Cebu Schools Athletic Foundation, Inc. (CESAFI) ug sa Philippine Collegiate Champions League (PCCL) Southern Islands championships.
Sila si Pingoy ug Pogoy nagduwa karon sa Far Eastern University.
Gipaabot nga makalingaw ang maong torneyo diin mag-abot sila si Pingoy ug si Mark Jayven Tallo, kinsa gikatahong moduwa sa Three-Sixty Pharmacy.
Si Pingoy dali kaayong misikat sa FEU diin siya maoy numero unong junior pointguard sa UAAP. Siya karon maoy giumol nga sunod nga Johnny Abarrientos isip King Tamaraw sa umaabot panahon. (BANAT NEWS)