CEBU, Philippines - Atubangon na ni IBF International featherweight champion Rey 'Boom Boom' Bautista ang labing mahinungdanong away sa iyang karera sa boksing sa dihang iyang sangkaon si Mexican knockout artist Miguel 'Terry' Mendoza karong gabii sa main event sa "Pinoy Pride X" didto sa Hoops Dome sa Lapu-Lapu City.
Gawas sa pagdepensa sa iyang bakus, maisip kini nga usa ka "make-or-break" fight ni Bautista, kinsa giplanohang paawayon og usa ka world title sa higayon nga modaog kini ni Mendoza.
"Is he ready for the big time? We will find it now," matud pa ni ALA Boxing Gym big boss Antonio 'Bidoy' Aldeguer. "If he passes through this fight then he is ready. Mendoza is a dangerous opponent but I have trust in my boxer."
Miklaro si Bautista nga daku siya og respeto sa iyang kontra ug nagtuo nga hatagan siya ni Mendoza og lisud nga away.
"Di ko kompiyansa niya kay kusug pud pero salig ko kay sakto ko sa training," matud pa ni Bautista atol sa weigh-in kagahapon didto sa Pacific Mall-Metro Mandaue, dakbayan sa Mandaue.
"Grabe gyud ni among away og segurado nga aduna gyuy matumba namong duha."
Atol sa weigh-in ang duha ka boksidor parehong mitimbang og 122 lbs.
Sa iyang bahin, si ALA chief tactician Edito Villamor namahayag nga bisan pa og pulos misaad og knockout ang duha ka boksidor, andam si Bautista nga molahutay hangtod sa 12 rounds.
"Daku og chance ang knockout, pero si Boom Boom kay ready to go 12 rounds," matud ni Villamor.
Sa supporting bout, ang super bantamweight prospect nga si Genesis 'Azukal' Servania makigsinukliay og kumo batok sa laing undefeated Mexican nga si Marcos 'Geraldito' Cardenas.
Si Romeo Jakosalem laraw nga moangkon sa OPBF light welterweight title batok ni Pan Soo Kim sa South Korea, samtang ang world-ranked flyweight nga si Rocky 'The Road Warrior' Fuentes makigharong ni Lookdiaw Tor Buamas sa Thailand. (BANAT SPORTS)