Giuseppe miihaw sa CEC sa 14th Aboitiz Football Cup

CEBU, Philippines - Gilabhan sa Giuseppe team ang kontra niining Cebu Eastern College aron magpabiling walay pilde human sa tulo ka duwa sa boys 12 division sa 14th Aboitiz Football Cup didto sa Aboitiz Sportsfield sa Brgy. Subangdaku, Mandaue City.

Sa laing aksiyon sa boys 12 division, ang SFC misakiyo sa ilang ikaduhang sunod-sunod nga daog dihang ila sab nga gisirohan ang MABES 7-0.

Sa players 6, ang Giuseppe miposte og 1-1 draw uban sa Canduman Dedon ug ingon man batok sa Sacred Heart School-Ateneo de Cebu sa players 10.

Sa laing bahin, ang San Roque Football Club (SRFC), mihipos sa labing una nilang daog sa players 6 batok sa Don Bosco Technology Center, 1-0, samtang ang Bright Academy-A ug Montessori-Canduman parehong nitapos sa duwa nga walay iskor.

Sa players 8 division, ang Bright Academy mipukan sa SRFC, 1-0, ang Springdale nakabawi gikan sa ilang kapildihan pinaagi sa pagbuntog sa DBTC-C, 9-5, samtang ang Canduman mimakmak sa DBTC-3, 9-0.

Sa players 10, ang DBTC-1 midemolis sa CIE-1, 12-0, samtang ang DBTC-5 mipulbos sa DFC, 7-0. (BANAT SPORTS)