Rollway nidaog na gyud

CEBU, Philippines - Nabugto ang duha ka sunod-sunod nga pilde sa Rollway Customs Brokerage pinaagi sa paglubong sa Mat & Ricky, 61-38 sa nagpadayong BSBA-Lauro Cup basketball tournament niadtong Domingo didto sa Barangay Buaya gym sa Lapu-Lapu City.

Ang Rollway ni team owner Rolly dela Pieza maoy midiktar sa duwa diin nilabaw kini og sayes puntos sa halftime, 31-25.

Gikalingawan og inat sa Rollway ang ilang labaw sa third period hangtod nga miabot kini ngadto sa 16 puntos paghuman sa maong kuwarter sa iskor nga 49-3 sa pagpangulo ni Michael Quijano, kinsa maoy topscorer sa maong kadaugan pinaagi sa iyang 18 puntos.

Natakdan sab sa iyang kainit silang Archie Tesaluna ug Naldo Tampus nga parehong mirehistro og double figures sa ilang 15 ug 12 puntos matag usa.

Si Ely Andrin maoy nangu sa pilderong Mat & Ricky nga mihabwa og 19 puntos, apan nausik lang ang iyang mga paningkamot kay wala kini makakuha og igong suporta gikan sa iyang kaubanan.

Ang Rollway ni coach Billy Nadado nagbitbit na karon og 1-2 win-loss record, samtang ang gibiktima nilang Mat & Ricky wala pa makatilaw og daog sud sa tulo ka duwa.

PUNTOS MATAG USA

Unang duwa:

ROLLWAY (61) - Ouano 18, Tesaluna 15, Tampus 12, Villaflor 8, Godinez 7, Torreon 4, Inot 4, Pino 2, Abing 2, Bancale 2

MAT & RICKY (38) - Andrin 19, Matidios 8, Sidra 6, Casio 6, Enriquez 6, Diaz 3, Tampus 3, Neneng 2  (BANAT SPORTS)