Gibag-ong Consolacion tennis courts ablihan ugma

CEBU, Philippines - Usa ka free clinic, exhibition matches ug derby ang molamas sa pormal nga paglusad sa gibag-o nga Consolacion tennis courts ugma adlawa.

Uban sa mga paningkamot sa Cebu International Tennis Centre Inc., upat ka hard courts ug upat sab ka clay courts ang  magamit  na unya alang sa mga Sugbuanon nga gustong moduwa ug ingon sa ensayo.

Ang ribbon-cutting ug blessing sa mga korte pangulohan ni Consolacion Mayor Teresita P. Alegado uban sa mga opisyales sa CITCI ug OTR.

Isunod dayon ang exhibition game tali ni 26th Southeast Asian (SEA) Games medalist Johnny Arcilla ug Jason Sankey sa Hong Kong.

Si Arcilla gikatakdang moduwa sa PCA Open sa sunod adlaw, apan nakasaad na kini nga motambong sa kalihukan alang sa iyang kadugong Sugbuanon. 

Usa ka doubles exhibition game ang masaksihan diin ang Sugbuanong Kennex Abadia ug RJ Abarquez makigbatok sa tandem nilang Graeme Foster ug Adrian Montesinos.

Ang clinic himuon inig ka hapon.

Gawas sa mga trainees sa CITCI nga adunay 130, laing interesadong indibidwal ang mahimo sab nga moapil sa clinic alang sa aspiring netters nga nag-edad og singko ngadto sa 18 anyos.

Alang sa dugang mga impormasyon, mahimong mokontak ni Nestor Toledo sa  0922-9488739 ug  0917-9118779.

Human sa clinic, adunay tennis derby diin ang  tanan giawhag sa pagtan-aw.  (BANAT SPORTS)