Adlaw sa paghukom

CEBU, Philippines - Adlaw karon sa paghukom alang sa defending champion University of Cebu (UC) Webmasters ug Southwestern University (SWU) Cobras sa dihang magsangka sila sa katapusang higayon sa deciding game sa ilang "best-of-five" finals series sa seniors division sa 11th Cebu Schools Athletic Foundation Inc. (CESAFI) basketball event karong gabii.

 Ang duwa gitakda sa alas-5:30 sa hapon.

Usa ra ka duwa ang ipahigayon karon kay ang laing tinaktakay sa finals tali sa Sacred Heart School-Ateneo de Cebu (SHS-AdC) Magis Eagles ug University of the Visayas (UV) Baby Lancers alang sa korona sa juniors division duwaon ugma, kini sumala pa ni league commissioner Felix O. Tiukinhoy Jr.

Hamugaway unta ang kampanya sa Webmasters pagdepensa sa ilang korona dihang ilang giharos ang unang-duha ka duwa. Nidaog sila sa series opener niadtong Oktubre 29 sa iskor nga 87-84 ug nasundan niadtong Oktubre 31 sa iskor nga 91-84 aron moposte og 2-0 sa series.

Apan ang kampanya sa Webmasters pag-iskor og 3-0 sweep nasuhong dihang gilubong sila sa Cobras og 38 puntos sa Game-3, 57-95. Misamot kangitngit ang kampanya sa Webmasters human sab midaog ang Cobras sa Game-4, 67-65 aron pagpuwersa ngadto sa rubbermatch.

Ang Webmasters nagtinguha nga mosakmit og back-to-back CESAFI titles ubos sa liderato ni 6-foot-9 center Junemar Fajardo, kinsa nagtinguha og usa ka graceful exit sa iyang katapusang tuig uban sa UC.

Si Fajardo pagasuportahan nilang Edward Pao, Robinson Mohammad, Quinton Brian Heruela ug Francis Luigi Bercede. Magsandig sab sila nilang Jan Michael Auditor, Gerald Ampoon, Roger Caytuna, Alvin Labolabo ug John Raphael Aranas.

Sa laing bahin, ang Cobras nagtinguha sa ilang unang korona sukad sila miapil sa liga walo na ka tuig ang nilabay.

Aron matuman ang misyon, ang Cobras maghangad sa ilang 6-foot-6 center Justin Aboude uban nilang Eleazar Armecin, Bonifacio Guillena, Benito Ortuyo, Joseph Nalos, Monbert Arong, Bernie Bregondo ug Jhonard Pineda.   (BANAT SPORTS)