CEBU, Philippines - Gipakita sa University of Southern Philippines Foundation (USPF) Baby Panthers ang ilang kamangtas aron pagtumba sa defending champion Cebu Eastern College (CEC) Dragons, 77-62 sa juniors division sa 11th Cebu Schools Athletic Foundation Inc. (CESAFI) basketball event kagabii didto sa Cebu Coliseum.
Kinahanglan sa Baby Panthers modaog sa sunod nilang duwa aron maangkon nila ang ikatulong dapit.
Nakatampo ang tanan sa kadaugan sa Baby Panthers ilabi na sa ilang mga higante nga sila si Jason Cando ug Winston Bolivar nga maoy mitubos sa kabugnaw sa duwa sa ilang leader scorer nga si Rommel Diapera, kinsa igo lang mi-iskor og nuybe puntos.
Si Cando mipabuto og 22 puntos, samtang si Bolivar miariya og 15 puntos ug ang ilang point guard nga si Jomari Gairanod mihirit og 12 puntos.
Dili batasan sa Dragons nga magpapilde ngadto sa Baby Panthers, kinsa ilang giharos sa niagi nilang duha ka duwa.
Ang Dragons, kinsa tinguhang mobangon sa sunod nilang duwa, gipangulohan ni Alfred Sedillo pinaagi sa iyang 15 puntos, gisundan ni James Neil Sumayang nga adunay 12 puntos. (BANAT SPORTS)