Rollway sud sa semis sa Lapu-Lapu Mayor's Cup

CEBU, Philippines -  Nakalingkawas gikan sa makutas nga duwa ang Rollway Customs Brokerage pinaagi sa pagpilde sa Avon Lopena, 101-99 aron makakuha og pasaporte sa semifinals sa commercial division sa nagkainit nga aksiyon sa Lapu-Lapu Fiesta Mayor's Cup basketball tournament niadtong Biyernes didto sa Lapu-Lapu City gym.

Ang Rollway ni team owner Rolly dela Pieza ug coach Chaky Caro mipasilong sa semis bitbit ang limpiyong 3-0 nga baraha.

Sayong nanginit ang Rollway ug maoy naglabaw paghuman sa first quarter, 31-21 sa giya sa ilang leading scorer Jerry Lomongsod. Gipakita ni Lomongsod nga aduna siya'y igong katakus sa pag-agak sa iyang koponan dihang mihaw-as siya og 23 puntos aron pangulohan ang Rollway, kinsa mipukan sa mas lig-on nga Avon Lopena nga gibidahan ni ex-PBA cager Danny Aying ug Alex Cainglet.

Mihulga ang Avon Lopena sa second half diin ilang napahakan ang labaw sa Rollway ngadto sa single digit. Nahimong kulbahinam ang aksiyon human misikit sa iskor ang Avon Lopena ngadto na lang sa dos puntos ug buot pa unta nilang sakmiton ang daog, apan pakyas kini gumikan kay nahubsan kini sa oras.

Si Aying maoy nangu sa Avon Lopena nga miburak og 21 puntos, samtang si Cainglet mibahog og 18 puntos.

Ang torneyo gipaluyohan ni Mayor Paz Radaza uban sa abag ni city councilor ug sports committee chairman Harry Radaza, Larry Villanil ug Randy Ymbong.

Puntos matag usa

ROLLWAY (101) - Lomongsod 23, Tarona 16, Morata 14, Resilla 13, Sala 8, Escario 8, Berido 7, Baguio 4, Villanil 4, Amores 4, Amistad 2

AVON LOPENA (99) - Aying 21, Cainglet 18, Labares 18, Maraño 17, Brozon 10, Getubig 4, Doy 4, Suarez 3, Lastimosa 2 (BANAT NEWS)