ANS, Unit 8 nidominar sa 21st Cebu City Olympics

CEBU, Philippines - Ang Abellana National School (Unit 9) ug ang Unit 8 maoy milangkat sa overall titles sa ilang tagsa-tagsa ka dibisyon sa pagtapos sa usa ka semanang 21st Cebu City Olympics kagahapon didto sa Cebu City Sports Center.

Ang ANS nidaog sa kampiyonato sa secondary category human makaani og 341.5 points.

Ni-okupar sa ikaduha ang University of Cebu (UC) nga adunay 266.5 points, gisundan sa University of San Carlos-Basic Education (USC-BEd) bitbit ang 201.5 points, University of San Jose-Recoletos (USJ-R) sa ilang 140.5 points ug University of the Visayas (UV) nga nipupo og 69 puntos.

Sa elementary division, ang Unit 8 misakmit sa korona uban ang 168 points, gisundan sa Unit 7 nga adunay 155 points.

Mikompleto sa top five finishers naglakip sa Unit 2 nga adunay 135.17 points, Unit 1 sa ilang 126 points ug USC-BEd uban ang 122 points.

Sa duwang volleyball didto sa Cebu City Sports Institute (CCSI), ang ANS ug USJ-R maoy nanghawod sa boys ug girls secondary volleyball, samtang ang Colegio del Sto. Niño ug Tejero Elementary School (Unit 7)   maoy nanghawod sa elementary class.

Didto sa Aznar Coliseum, ang UV Baby Lancers miihaw sa Cebu Eastern College (CEC) Dragons sa iskor nga 93-79 aron maangkon ang titulo sa boys secondary.

Ang UC ug City Central School (CCS) sa Unit V nidominar sa secondary ug elementary division sa table tennis event.

Si Dannel Jay Tormis sa UC naghari sa boys singles, samtang ang iyang teammate nga si Jeramae Saromines nanghawod sa girls division.

Ang tandem nilang Lezlie Agbon ug Diana Oliverio ug ang paresan nilang Lemuel Agbon ug Val Stephen Jaca miharong sa secondary doubles event. (BANAT SPORTS)

Show comments