Dela Pieza daku'g natampo sa White team

CEBU, Philippines - Wala lang makatabang si Rolly dela Pieza sa inadlaw- adlaw nga panginahanglan sa iyang mga tawo, apan lakip na usab sa paugnat sa kusog dihang gitabangan ang iyang White team, kinsa walay puangod nga milubong buhi sa Red team, 115-83 sa Inter-Color division sa Phase 2 Camella Homes Sunday Club Basketball Association cagefest niadtong Domingo didto sa Villas Magallanes gym sa Lapu-Lapu City.

Walay bisan usa sa upat ka kuwarter ang nadag-an sa Red team, gani ang White team ni team owner Rolly dela Pieza mitarok og 25 puntos nga labaw human sa unang 10 minutos sa duwa. Miburot pa kini ngadto sa 35 puntos sa third period, 88-53.

Laktod pagkasulti, ang White team maoy nidominar sa kinatibuk-ang duwa.

Sa maong duwa, mikatol na sab ang mga kamot ni Dela Pieza diin miugkat kini og 14 puntos nga napuslan ug nakatabang sa dili mabangbang nila nga kadaugan. Apan sila si Ondo Casquejo ug Malolot maoy topscorers sa managsama nilang 31 puntos. Sama ni Dela Pieza, si Centes Brañanola mikabkab sab og 14 puntos sa maong kadaugan.

Nakaluhaan ni Roilan Sumilang ang iyang game-high 19 puntos sa miaging semana aron pangulohan ang Red team, kinsa wala gyud makasuway og sikit ug bugtong nilang konsuylo mao ang pagkitkit og gamay sa labaw sa final period.

Sa laing aksiyon, nakabangon ang Tubemakers human masugamak ngadto sa Sutike Yama Resto Bar dihang ilang gipahimungtan ang Ryle Trucking sa iskor nga 95-89 sa Inter-Company division. - BANAT NEWS