Nietes 2-division champ, Garcia gusto og rematch

CEBU, Philippines - Natuman ang damgo ni ALA boxing superstar Donnie “Ahas” Nietes human siya nahimong bag-ong Pinoy two-division world champion human niya gipilde pinaagi sa unanimous decision ang Mehikano nga si Ramon Garcia Hirales niadtong miaging gabii sa “Pinoy Pride 9” didto sa University of St.La Salle Gym sa Bacolod City.

Ang kanhi janitor nga si Nietes mao karon ang bag-ong WBO light flyweight champion ug gawas pa niini siya usab ang kanhi WBO minimumweight title sa wala pa niya kini gibakante.

Nalakip karon si Nietes sa nagkataas nga lista sa mga Pinoy boxing champion nga misakmit og multiple title sa managlahing dibisyon sama nila ni Manny Pacquiao, Nonito Donaire Jr, Luisito Espinosa, Brian Viloria ug managsuong Dodie Sr. ug Gerry Peñalosa.

Kusug ang sinugdanan ni Nietes kinsa mipakita sa iyang kabangis sa unang upat ka rounds pinaagi sa pagpaigo og mga hait nga uppercut ngadto ni Garcia kinsa nagkabuang pagpanagang sa atake sa lumad nga taga-Murcia sa Negros Occidental.

Hinuon, misumbalik og atake si Garcia ug mipresyur ni Nietes kinsa miaksiyon og kaluya sa pagsugud sa seventh round tungod usab sa kaagresibo sa Mehikano.

Kapila usab nagisian si Nietes human sa mga headbutt ni Garcia, apan inay mawad-an og paglaum, nangisog na hinuon si Nietes sa 11th round dihang iyang gidabo-dabohan ang Mehikanong boksidor.

Misulod sa final round nga pulos naluya sila si Nietes ug Garcia, apan wala gihapon kini makapugong sa subling pagsinukliay og kumo sa duha.

Human sa 12 round sa binukbukay tulo ka mga hurado ang mihatag og 115-113, 118-110 ug 117-111 tanan pabor ngadto ni Nietes.

Sa ilang bahin, daling miprotesta ang kampo ni Garcia sa resulta tungod sa pagtuo nila nga sila ang midaog ug dili si Nietes. Mismo si Garcia ang mihagad ni Nietes og rematch didto sa Mexico.

Wala hinuoy supak niini si ALA Promotions CEO Michael Aldeguer kinsa uyon sa maong rematch, apan iyang giklaro nga si Nietes ang tinuoray nga midaog og sakto ang hukom sa mga hurado.

Sa supporting bout, grabeng kastigo ang gipahamtang ni AJ “Bazooka” Banal batok sa Mehikano nga si Mario “Maca” Briones kinsa nakahiagum sa labing una niining kapildehan. Si Banal midaog sa usa ka dominante nga unanimous decision victory.

Sa nindot nga gipakita ni Banal, hayan makuha niya ang rematch batok sa bugtong boksidor nga nakapilde kaniya nga si Rafael Concepcion sa Panama. Gawas pa niini, gipahibalo usab ni Aldeguer nga posibling moaway usab alang sa world title si Banal sa sunod tuig.

Sa iyang bahin, gipamatud-an usab sa 17-anyos nga si Albert Pagara nga anaa kaniya ang potensiyal nga mahimong pambato sa ALA Gym human niya gipilde pinaagi sa unanimous decision ang Tanzanian nga si Shaaban Madilu.  - BANAT NEWS