Sumilang miposte og career-high 19 pts.

CEBU, Philippines -  Mirehistro sa iyang career-high 19 puntos si Roilan Sumilang nga nakatampo og daku sa kadaugan sa Red team nga mipukan sa White team, 104-101 sa Inter-color sa Phase 3 Camella Homes Sunday Club basketball tournament niadtong Domingo didto sa Villas Magallanes gym, Lapu-Lapu City.

Walay bisan usa ka magduduwa sa White team ang nakapugong sa pagmangtas ni Sumilang, kinsa miladlad sa    dugay na kaayong gitagoan niyang abilidad aron mo-iskor og daku sa labing unang higayon sa maong liga.

Aduna untay nangahas pagpugong ni Sumilang, apan pakyas kini gumikan sa kaidlas sa naulahi, kinsa yano kaayo mipasulod og mga puntos aron tabangan ang Red pagposte og daog.

Kanunay naggukod ang Red team sa unang-tulo ka kuwarter ug diha na kini nakabangon sa final period luyo sa mga paningkamot ni Allan Sepe, kinsa maoy topscorer nga miligwat og 24 puntos. Si Amay Palad mi-iskor sab og double pinaagi sa iyang 21 puntos.

Si Ondo Casquejo milansang unta og 36 puntos, apan nakawang lang kini kay wala kini makapadaog sa White team. Si Rolly dela Pieza miamot og 20 puntos, samtang si Leo Almacen mitampo og 14 puntos.

Sa Inter-company, ang Rylle Trucking miratsada og daog batok sa Sutike Yama Resto Bar sa iskor nga 100-98.

PUNTOS MATAG USA

Unang duwa:

RED (104) - Sepe 24, Palad 21, Sumilang 19, Balberona 14, Ragaza 10, Geraldez 7, Aparente 5, Diongzon 4

WHITE (101) - Casquejo 36, R. Dela Pieza 20, Almacen 14, Pleños 10, Caro 9, Brañanola 6, Amistad 6

Ikaduhang duwa:

RYLLE TRUCKING (100) - Adrino 21, Palad 18, Saavedra 14, Jongjong 10, Erejer 10, Delgado 8, Regner 4, Suamo 4, Dela Pieza 4

SUTIKE YAMA (98) - Dela Pieza 24, Pleños 19, Suamo 16, Hinoguin 14, Brañanola 14, Abel 6, Dela Pieza 3 (BANAT NEWS)