Pacquiao, aboude nag-wild

CEBU, Philippines - Mibahug og sagunson 10 puntos sa fourth quarter sa iyang kinatibuk-ang 14 puntos ang gamitoy nga pointguard sa University of the Visayas (UV) Green Lancers nga si John Michael Abad aron mahimong yawe sa ilang kadaugan batok sa kanhi walay pildeng University of Cebu (UC) Webmasters sa iskor, 74-69 aron putlon ang 9-0 streak kaniadtong Domingo atol sa nagpadayong 11th Cebu Schools Athletic Foundation, Inc. (CESAFI) basketball season didto sa Cebu Coliseum.

Silang Pacquiao ug Aboude maoy nangunay sa pagmakmak sa Jaguars samtang ang shooting guard sa Cobras nga si Bonifacio Guillena Jr. wala himatikdi nga midugang og 11 puntos kadaghanan niini gikan sa mga tagak nga bola ug si Eleazar Armecin miligwat og 12 puntos alang sa Cobras kinsa mainitong mi-inat sa ilang labaw didto sa fourth period aron mahimo kining 19 puntos nga kadaugan.

Ang forward sa Jaguars nga si David Cinco mag-atubang karon og one-game suspension human sila ma-thrown out sa kataposang 1:18 sa fourth quarter pinaagi sa paglabyug sa iyang siko ngadto kang Armecin ug dili siya makaduwa batok sa CIT-U Wildcats.

Hugot ug pisikal nga depensa ang gipahamtang sa Jaguars ngadto sa Cobras hinungdan nga mi-init ang duwa aron bisan pa niana, gilampurnas sa Cobras ang ilang undermanned nga kontra tungod kay wala makaduwa alang sa Jaguars silang Jason Nudalo ug Banjo Capillar.

Diha unta’y gamay nga milagro nga nakita sa Jaguars apan igo lang silang nakatilaw sa labaw bali’g 13 segundos tungod kay human sa basket ni Midjet dela Rama, 43-42 sa may 7:33 ang oras sa third period, dali kining gibawi ni Pacquaio, 44-43 sa 7:20 ang oras sa mao gihapon nga period.

Sukad niadto, kanunay nang naglabaw ang Cobras ug wala na mosaler ang rally nga gitinguha sa Jaguars aron pabiling walay pilde sa second round, 3-0 ug sa ilang 6-3 nga baraha, segurado na silang adunay luna sa semifinals.

Nagmangtas si Jason Olbedado alang sa Jaguars diin ang iyang otso puntos sa third period maoy mitabang sa iyang team nga molutaw ibabaw sa tubig aron dili malumos. Mipugnit og 23 puntos si Olbedado alang sa Jaguars samtang si Abulaiz Suliman ug Dela Rama midugang og 16 ug 15 puntos, matag usa.

Puntos matag usa:

SWU (Srs.) 94— Pacquiao 28, Aboude 22, Armecin 12, Guillena 11, Bregondo 9, Nalos 5, Ortuyo 5, Arong 2

USJR (Srs.) 75— Olbedado 23, Suliman 16, Dela Rama 15, Sanchez 10, Tabaloc 6, Cinco 2, Lajato 2, Frioco 1 Halftime: 40-34 (Gabby G. Malagar)

marcos pilde ni dodie boy jr.

Dili lang ang pagkulit sa ikapito niyang knockout nga kadaugan ang naani ni super bantamweight prospect Dodie Boy Peñalosa Jr., lakip na usab niini ang usa ka importanteng leksyon alang sa iyang batan-ong boxing career.

Ang 21-anyos nga si Peñalosa mipaundang sa beteranong si Donriel Marcos sa main event sa “Dugong Kampeon” fight card sa miaging gabii didto sa Hoops Dome sa Lapu-Lapu City .

Apan dili sayun ang maong kadaugan tungod kay sa labing unang higayun, nakatilaw si Dodie Boy Jr. sa labing una niyang knockdown human maigo sa makabungog nga right overhand ni Marcos sa first round.

Dali hinuon nakarekober ang kanhi amateur standout, apan klaro kaayo nga nakuratan kini sa wala damhang pagkatumba.

Pag-abot sa second round, gisuwayan pag-alkontra ni Peñalosa ang di kasarang istilo ni Marcos kinsa nagpunay og hapus sa iyang kumo, apan subling mihigda sa ring si Dodie Boy Jr. human maigo sa lowblow.

Nakabangon si Dodie Boy Jr. human sa gihatag nga lima ka minuto nga pahuway ug nakahimo pagtiwas sa round.

Gipadayun ni Dodie Boy Jr. ang iyang atake sa lawas ni Marcos sa misunod nga round ug didto hinay-hinay nga naluya ang 28-anyos nga boksidor nga maoy mipaaghat sa iyang korner nga hunungon ang away sa 2:54 sa third round.

“Leksyon gyud to nako. Sobra ra ka confident unya wa sad nako bantayi ang iyang sukmag unya nakalitan pud ko ato kay murag gilambos to sukmaga,” matud pa ni Dodie Boy Jr. human sa away.

Ang kanhi world champion ug karon promoter nga si Gerry Peñalosa miisip hinuon sa maong panghitabo isip nindot nga butang alang sa iyang pag-umangkon aron mas mapalambo pa niini ang iyang inawayan.

Gitug-an usab niya nga dili lang una niya i-ahat si Dodie Boy Jr. sa plano unta nga paglakip niini sa undercard sa Manny Pacquiao-Juan Manuel Marquez trilogy sa Nobiyembre 11 didto sa Las Vegas.

“Wag muna. He will have his chance, pero sa pagkakaron kinahanglan pa gyud nga makakuha si Dodie Boy og daghang experience,” matud pa ni Gerry Peñalosa.

Sa supporting bout, gilangkat ni Michael Fareñas ang Philippine featherweight title batok ni Edgar Gabejan, gipaluhod ni Eden Sonsona sa seventh round si Godwin Tubigon, samtang midaog sa iyang debut fight si Dave Peñalosa batok ni John Edu Torbiso. (Lemuel P. Maglinte)

2011-2012 NBA season kanselahon?

Pakyas na sab ang sabotsabot tali sa NBA Players Association ug ni commissioner David Stern hinungdan nga mihulga si Stern nga kanselahon na lang ang kinatibuk-ang 2011-12 season kung dili gyud mahusay ang wala pagsinabtanay sa duha ka kampo.

Hinoon, ang mga tinubdan sa NBA union naglantaw niini isip usa ka "negotiating tactic" inay sa usa ka lehitimong hulga ug susama sab niini ang mga komentaryong giluwatan ni Stern samtang nakighinabi sa mga reporters didto sa New York kaniadtong Miyerkules atol sa ikaduhang sagunson nga adlaw sa sabotsabot.

Kalabot sa meeting niadtong Biyernes, gilauman nga adunay 15 ka team owners ug pipila ka mga star players ang mitambong ug usa niini si LeBron James sa Miami Heat.

Matod pa ni Stern "I'm focused on let's get the two committees in and see whether they can either have a season or not have a season, and that's what's at risk this weekend."

Kaniadtong 1998-99 season nga maoy bugtong season sa kasaysayan sa NBA nga nawagtang ang regular-season games tungod sa usa ka lockout o "work stoppage", walay nakab-ot nga solusyon hangtod na sa Enero 6, 1999 ug ang 50-game season gisugdan og duwa niadtong Pebrero 6, 1999.

Padayon pang gibantayan ang mga komentaryo ni Stern ngadto sa media kung aduna ba siya'y tumong sa paghadlok aron pagkumbensir sa mga mga players sa pagdawat na lang sa kasabotan uban sa pasalig nga dili dayonon sa NBA ang shortened o gipamub-an nga season.

Kalagmitan nga mahitabo, kanselahon ang regular-season games sunod semana ug seguardo na kini kung wala gihapoy' makab-ot sa ilang sabotsabot karong adlawa. (GGM)(BANAT NEWS)