Boxing sa Hoopsdome

CEBU, Philippines - Iladlad na ni undefeated knockout artist Dodie Boy Peñalosa Jr. ang iyang abilidad sa iyang pakigsangka batok ni Donriel Marcos sa main event sa "Dugong Kampeon" karong gabii didto sa Hoopsdome sa Lapu-Lapu City.

Isip kabahin sa ikatulong henerasyon sa mga world champions, laraw ni Dodie Jr. nga mokulit sa ikapito niyang sunod-sunod nga kadaugan aron ipamatuod nga andam na siya sa mas dagkung away.

Paningkamotan sa 21-anyos nga mohimo og impresibong daog aron may purohan kining moaway sa undercard sa Manny Pacquiao-Juan Manuel Marquez title showdown karong Nobiyembre 12 didto sa MGM Grand Garden Arena sa Las Vegas.

Atol sa weigh-in kagahapon, ang kanhi amateur standout mitimbang og 122 lbs., samtang si Marcos, sa Lanao del Norte, mitimbang og 123 lbs.

Sa iyang bahin, ang kanhi two-division world champion nga si Dodie Boy Sr. mipadayag sa iyang kompiyansa ngadto sa iyang anak nga molampos gihapon kini sa away batok ni Marcos pinaagi sa knockout.

Gibutyag ni Dodie Sr. nga tan-awon una nila ang estilo ni Marcos sa dili pa nila kini tumbahon sa ikalima o ikaunom nga round.

"Wa pa mi kita sa inawayan ani niya (Marcos) mao nang amo lang sa ni hinay-hinayan ug kun tinuod nga brawler ni, among birahan ug suwayan namo pagpatumba sa fifth o sixth round," matud pa ni Dodie Sr.

Gawas sa iyang kinamaguwangang anak, mobarog usab sa corner si Dodie Sr. sa away sa kinamanghoran niyang si Dave Peñalosa, kinsa mohimo sa iyang debut fight   batok ni John Edu Torbiso.

Lakip sa mo-away sa maong boxing card mao si Michael Farenas batok Edgar Gabejan alang sa Philippine featherweight title ug Eden Sonsona, kinsa makigharong ni Gadwin Tubigon sa Cagayan de Oro City.   (BANATSPORTS)