Dodie Boy Jr. kontra beterano

CEBU, Philippines - Padayonon sa Sugbuanong super bantamweight prospect Dodie Boy Peñalosa Jr. ang iyang nasugdan, dihang mosuway na kini pag-iskor og laing daog, ning higayona batok ni Donriel Marcos sa main event sa "Dugong Kampeon" karong Sabado sa gabii didto sa Hoops Dome sa Lapu-Lapu City.

Ang kanhi amateur standout nga si Peñalosa Jr., anak ni former two-division world champion Dodie Sr., lab-as pa gikan sa ikaunom niyang sunod-sunod nga daog batok Thai fighter Kong Kiatpracha Gym sa miaging bulan didto sa Mandaue City Cultural and Sports Complex.

Apan si Peñalosa suwayan na sab pagsukod sa iyang katakus batok sa beteranong si Marcos, kinsa layo na kaayo ang naabtan nga adunay 23 ka away lakip niini ang mga sangka batok ni former intercontinental champion Ramie Laput ug sa ALA boxers nga sila si Larry Canillas ug Genesis Servania.

"Ako gyud ni siyang (Marcos) gipangandaman og sakto, lahi sa miagi nakong away nga wala ko katarung og sparring tungod sa akong gisi sa kilay, pero karon sakto akong preparasyon ug bisan beterano ni, akong kayahon," matud pa sa 21-anyos nga si Peñalosa Jr. atol sa press conference kagahapon didto sa Sports Exchange Bar and Grill.

Sa iyang bahin, ang boxing champion-turned-promoter nga si Gerry Peñalosa, miingon nga ang maong away magsilbeng sukdanan alang sa iyang pag-umangkon nga giplanohang paawayon sa undercard sa Manny Pacquiao-Juan Manuel Marquez showdown sa November 12 didto sa Las Vegas.

Gawas pa niini, si Peñalosa may giandam nga regional youth title fight alang ni Dodie Boy Jr. batok sa usa ka Australiano dinhi sa Sugbu.

Sa supporting bouts, ang IBF world ranked nga si Michael Farenas makigharong ni Edgar Gabejan alang sa Philippine featherweight title, samtang ang comebacking nga si Eden Sonsona makigbinukbukay batok ni Gadwin Tubigon sa Cagayan de Oro City.

Mohimo usab sa iyang pro debut fight ang manghod ni Dodie Boy Jr. nga si Dave Peñalosa batok ni John Edu Torbiso.

Ang official weigh-in himuon karong adlawa diha sa Games and Amusement Board (GAB) office.

Ang maong boxing promotion gisuportahan usab sa GMA-7, Lapu-Lapu City Government ubos sa liderato ni Mayor Pat Radaza ug sa Lapu-Lapu Sports Commission sa pagdumala ni councilor Harry Radaza.  (BANATSPORTS)