Dragons milamoy sa Wildkittens

CEBU, Philippines - Kinahanglan nga mokayod pa og maayo ang defending champion Cebu Eastern College (CEC) Dragons aron matukob ang ikaupat nilang daog batok sa Cebu Institute of Technology-University (CIT-U) Wildkittens, 67-62 sa secondary match sa 11th Cebu Schools Athletic Foundation Inc. (CESAFI) basketball event kagahapon diha sa Cebu Coliseum.

Sa miaging tuig, ilang gilubong ang CIT-U, 87-57, apan lahi ang ilang duwa kagabii kay mitabok pa kini og pito ka lawod sa wala pa sila maabot sa ilang padulngan nga kadaugan.

Salamat sa crucial free throws ni Luther Huevos sa katapusang nuybe segundos nga nakapaginhawa'g lawom sa Dragons.

Misikit ang Wildkittens human sa basket ni Niko Otadoy, 62-65, apan ang Dragons aduna pay igong oras ug ang duha ka koponan pulos na anaa sa penalty situation.

Gibati'g kaluya ang Dragons human ma-fouled out si James Neil Sumayang sa nahabiling singko minutos sa final period.

Apan bisan pa niini, si Sumayang mao gihapon ang nangu sa Dragons nga milawog og 22 puntos ug si Alfred Anecito Sedillo mihungit og 12 puntos. Sila si Huevos ug Rex Darwin Villarosa mihatag og 10 puntos matag usa alang sa ilang 4-1 nga baraha.

Si Otadoy nga maoy bayani sa ilang 59-56 nga kadaugan batok sa University of San Jose-Recoletos (USJ-R) Baby Jaguars, maoy topscorer sa Wildkittens pinaagi sa iyang 15 puntos.

Sa laing aksiyon, ang University of Southern Philippines Foundation (USPF) Baby Panthers milubong sa Baby Jaguars sa iskor nga 100-70.

Midaog na gyud ang University of San Carlos (USC) Baby Warriors pinaagi sab sa paglubong sa University of Cebu (UC) Junior Webmasters sa iskor nga 59-48. (BANATSPORTS)