RDAK/Edcon pabiling nagsolo sa liderato

CEBU, Philippines - Wala mahago ang RDAK/Edcon ni Sacred Heart Ateneo Alumni Basketball Athletic Association (SHAABAA) outgoing president Regan King pagkutlo og daog kay wala motunga ang kontra nilang San Remigio Beach Club sa nagpadayong SHAABAA-Cebu Landmaster's Cup didto sa SHS-AdC campus sa Canduman, Mandaue City.

Gumikan niini, ang RDAK/Edcon nagpabiling nagsolo sa liderato nga adunay 7-1 nga baraha.

Sa laing aksiyon, gilubong sa KIA Motors/White Gold ang Gaisano Capital, 82-48, samtang gipakuratan sa Kunstoff ang Dynacast, 58-54.

Ang KIA ug Dynacast nag-uban karon sa ikaduhang puwesto sa managsama nilang 6-1 win-loss records.

 Sila si Dave Lim ug Dennis Que maoy nangu sa KIA Motors sa ilang 18 ug 14 puntos matag usa, samtang si Frank Eduard Dinsay maoy nangu sa Gaisano Capital sa iyang 13 puntos. (BANATSPORTS)