Panthers nag-wild

CEBU, Philippines - Milusad og halapad nga rally ang University of Southern Philippines Foundation (USPF) Baby Panthers sa final period, dayon naghangad sa tandem nilang Rommel Diapera ug Winston Bolivar aron motukob og 88-77 nga kadaugan batok sa University of San Carlos (USC) Baby Warriors sa nagpadayong 11th Cebu Schools Athletic Foundation Inc. (CESAFI) basketball event kagabii diha sa Cebu Coliseum.

Labaw la'g usa ka punto sa halftime, 36-35 ug nabiyaan og dos puntos paghuman sa third period, 59-61, si Diapera, ang labing potensiyal nga scorer sa Baby Panthers mipahungaw sa iyang kainit diin mi-iskor kini og 10 puntos sa fourth quarter sa kinatibuk-an niyang 36 puntos.

Apan si Bolivar mipamatuod nga mas labi pa siyang kuyaw dihang mitusak siya'g 13 puntos sa final canto alang sa iyang 23 puntos, kasagaran niini gikan   sa three-point   plays.

Nidugang og kusog sa ilang opensa mao si Jori Martin Gairanod, ang ikatulong Baby Panthers nga mikutlo og double figures sa iyang 10 puntos, upat niini nahimo sa katapusang dos minutos sa duwa.

Indibidwal ang duwa sa Baby Panthers sa third period ug kagar sab ang ilang mga tira nga naghatag og higayon sa Baby Warriors pag-ilog sa labaw pinaagi sa duha ka sunod-sunod nga baskets ni Mitchell Antigua, apan napugngan ngadto lang sa kuwatro puntos sa final period ug igo lang mihipos og nuybe puntos sa tibuok duwa.

Si Ian Ortega miburak og 18 puntos aron pangulohan ang Baby Warriors nga wala pa makatagamtam og daog sud sa upat ka duwa, si Richard Sevellino mitimbre og 12 puntos, samtang si Justin Lim mitikdol og 11 puntos.  - BANAT NEWS