Los Demonyos 3-0 ang baraha sa 7th IBP Hoop

CEBU, Philippines - Nasakmit sa Los Demonyos ang liderato human sa ilang 83-76 nga kadaugan batok sa Pañeros kaniadtong Sabado atol sa nagpadayong 7th IBP Governor’s Cup-2011 basketball tournament didto sa Capitol Parish gym sa dan Escario, ning dakbayan.

Naunhan unta sa Pañeros ni Nilo Balorio ang Los Demonyos diin milabaw sila sa first period, 21-11 apan daling mibawos ang nahiuna sa ilang kaugalingong 26-14 run aron molabaw sa halftime, 37-35.

Padayong nanginit ang Los Demonyos pinaagi sa pagkumboya nilang Richard Bauzon ug Karl Salcedo aron protektahan ang ilang labaw bisan pa’g misikit pag-ayo ang Pañeros, 54-53 human sa third quarter.

Nagbanos-banos og labaw ang duha ka habig didto sa fourth period ug naputol kini dihang ang hotshot nga si Lito Ortiz mipabuhagay og sagunson 10 puntos alang sa Los Demonyos lakip niini ang walo ka free throws human sila magtabla sa 73-all sa kataposang 41 segundos sa duwa aron maka-ipsot ngadto sa siete puntos nga kadaugan.

Mihagdaw og 20 puntos si Ortiz ug gipaluyohan siya ni Bauzon ug 19 puntos.

Silang Michael Molde ug Ruel Juban maoy nangu sa Pañeros sa ilang 12 puntos matag usa.

Sa laing bahin, gilubong sa Super Idols ni Bong Pepito ang Eagles, 63-48 alang sa ilang ikaduhang daog sulod sa tulo ka duwa.

Silang Fermin Pepito ug Benjo Macion miposa og 15 ug 13 puntos matag usa aron pangulohan ang Super Idols samtang si Jun Hiyas maoy nangu sa 1-2 nga Eagles sa iyang 15 puntos.

Sa laing duwa, midaog ang Pecandela Law Firm batok sa Jodin, 60-53 alang sa 2-1 nga baraha.

Si Tommy Yu mibahug og 21 puntos alang sa Pecandela samtang si Brandon Enad midugang og 13 puntos samtang sila si Allan Geotina ug Mario Gidayawan maoy nangu sa Jodin sa ilang 11 puntos matag usa.

Midaog sab ang Bhutakalz-YLAC batok sa Primos Inter Pares ni Enrique Rama, 73-57.

Puntos matag usa:

First Game:

DEMONYOS (83)- Ortiz 20, R. Bauzon 19, Salcedo 11, Flores 8, Bragat 6, Pintor 6, Boholst 5, Riveral 4, E. Bauzon 2, Del Prado 2.

PAÑEROS (76)- Molde 12, Juban 12, Aliño 9, Busi 9, Cagulada 6, Balorio 5, Ruaya 5, Retuya 4, Calipayan 3, Cabilte 3, Denopol 3, Pepito 2, Ordeniza 1.

Second Game:

SUPER IDOLS (63)- F. Pepito 15, Macion 13, Apolinario 11, Mañuz 10, Sumampong 10, Argawanon 4.

EAGLES (48)- Hiyas 15, Lagahit 10, Solis 4, Remedio 4, Avila 4, Pareja 3, Godornes 3, Puspus 2, Vallecer 2, Arrabis 1,

Third Game:

PECANDELA (60)- Yu 21, Enad 13, MR Gamallo 8, Fr. Pepito 8, Avila 5, Malazarte 4, Cañete 2.

JODIN (53)- Geotina 11, Gidayawan 11, Reyes 10, Sarno 10, Capahi 7, Amores 4.

Fourth Game:

BHUTAKALZ (73)- Ang 25, Gealon 13, Ligutan 10, Verallo 10, Hupp 4, Arnaiz 4, Codera 3, Bernido 2, Guieb 2.

PRIMOS (57)- Miralles 30, M. Velez 6, Villegas 5, Sususco 4, Astillero 4, Badillos 2, En. Rama 2, Pascua 2, B. Velez 2.  - BANAT NEWS