Dragons nag-wild

CEBU, Philippines - Mipakita na sab sa ilang kamangtas ang defending champion Cebu Eastern College (CEC) Dragons ilabi na sa final period aron lamyon ang Don Bosco Technology Center (DBTC) Junior Greywolves, 92-59 alang sa ikaduha nilang sunod-sunod nga daog sa nagpadayong Cebu Schools Athletic Foundation Inc. (CESAFI) kagahapon diha sa Cebu Coliseum.

Naunhan ang Dragons sa unang 10 minutos sa duwa, apan hinay-hinay kining mipahungaw sa ilang kainit aron ilogon ang labaw sa halftime, 36-31 ug mao na ang nikontrolar sa tibuok second half.

Sila si Alfred Anecito Sedillo ug Michael Lorenzo Balankig maoy miduslit sa fourth quarter run sa Dragons aron palawman pa ang ilang labaw. Ang Dragons miposte sa labing daku nilang labaw, 90-57 sa nahabiling dos minutos sa duwa.

Si Sedillo mihabwa og 26 puntos aron pangulohan ang Dragons, gisundan ni Neil Sumayang nga mibugwak og 17 puntos ug Jefferson Roxas nga adunay 10 puntos. Si Balankig nga migradwit sa katapusang tres minutos sa final period, miligwat og nuybe puntos alang sa Dragons nga nagtangag og 2-1 nga baraha.

Ang Dragons nipukan sab sa Junior Greywolves sa miaging tuig sa iskor nga 115-63.

Si Stephen Niere mao lang ang bugtong player sa Junior Greywolves nga mi-iskor og double figures sa iyang 11 puntos.

Si Denille Scott Aying, anak ni coach Danny Aying napugngan lang ngadto sa tres puntos.

Puntos matag usa

CEC (92) - Sedillo 26, Sumayang 17, Roxas 10, Balankig 9, Huevos 6, Bauya 5, Yap 5, Villarosa 5, Pestaño 4, Zosa 3, Bracero 2

DBTC (59) - Niere 11, Pono 8, Mellijor 6, Tabaa 6, Balansang 4, Carbon 4, Geraldizo 4, Aying 3, Ruiz 3, Abelgas 3, Castro 3, Escaño 2, Aliling 2   (BANAT NEWS)