Magis Eagles dagit na sab og daog
CEBU, Philippines - Nabihag sa Sacred Heart School-Ateneo de Cebu (SHS-AdC) Magis Eagles ang Cebu Institute of Technology-University (CIT-U) Wildkittens, 89-62 alang sa ilang ikaduhang sunod-sunod nga daog sa secondary division sa 11th Cebu Schools Athletic Foundation Inc. (CESAFI) basketball event kagahapon diha sa Cebu Coliseum.
Sa sayo pa ang defending champion Cebu Eastern College (CEC) Dragons milamoy sab sa University of San Carlos (USC) Baby Warriors, 95-65.
Kontrolado sa Magis Eagles ang duwa diin miposte kini og double digits nga bentaha, apan ang daku nilang labaw napahakan ngadto na lang sa singko puntos, 62-57 sa fourth period.
Aron malikay sa peligro, ang Magis Eagles mipahimulos sa ilang height advantage aron dili na maka-rally ang Wildkittens.
Si Aaraon Sing mitira og 3-pointer nga maoy nagduslit sa rally sa Magis Eagles. Miabag sab sila si Dawn Ochea, Julius Cadavis ug Joshue Ong aron moposte og 72-57 nga bentaha.
Sila si Ochea ug Cadavis mi-iskor og 14 ug 13 puntos matag usa, alang sa Magis Eagles, samtang sila si Dave Yu ug Sing nagkumboya og 23 puntos alang sa ilang 2-0 nga baraha batok sa Wildkittens nga 1-1.
Si Jeraldvin Delima, usa sa mga higante sa CIT-U maoy nangu uban ang 19 puntos, samtang tulo niya ka teammates ang miposte sab og double figures.
Sa laing bahin, si Alfred Anecito Sedillo maoy nangu sa 1-1 nga Dragons pinaagi sa iyang 25 puntos, samtang ang 0-2 nga Baby Warriors gipangulohan sab ni Ian Ortega sa iyang 22 puntos. (BANATSPORTS)
- Latest
- Trending
