Phoenix Cyclomax mosuporta sa Keiz BJ moto-x series

CEBU, Philippines - Hilabihan na kadaku ang motocross series sa Keiz BJ Motors dihang ang Phoenix Cyclomax Titan 4T mobubo og suporta sa mga lumba niini.

Ang Phoenix Cyclomax Titan 4T ug Keiz BJ Motors magtambayayong sa third leg nga uloha'g "6th Anniversary Motocross Competition" nga gikatakda karong Agosto 21 didto sa Caduawan race track sa lungsod sa Tabogon, Cebu.

Usa lang ang Phoenix Cyclomax Titan 4T motorcycle oil sa mga produkto sa Phoenix Petroleum Phils. nga didto magbase sa Mindanao.

Una kining higayon nga mosuporta og motocross dinhi sa Sugbu ang Phoenix Petroleum.

"First time namo ni nga mopaluyo og motocross dinhi sa Cebu. Ang third leg 'tuning' namo para sa next leg, kun adunay mga kakulangan karon nga leg mapasupot namo sa sunod leg," matud pa ni Phoenix lubes and chemicals account manager Geoffrey Viñalon.

Gipangulitawhan sab ni Viñalon ang tulo ka mga anak ni Ornopia nga sila si Earl Jean Brylle, Ken Kerry ug Kerry Keizer aron himuong endorser sa Phoenix Cyclomax Titan 4T dinhi sa Visayas area.

"Plano nako nga ako sila himuong endorser sa Visayas. Na-engganyo ko nila nga bisan pa sa ilang pangedaron, nagpakita na sila og katakus pagpalupad sa motor," matud pa ni Viñalon. "Mag-agad lang ko sa desisyon sa akong labaw didto sa kaulohan."

Sa third leg, si Irwin Uypitching sa Dumaguete City manalipod sa iyang korona sa pro expert class batok ni Burnok Mangosong sa Davao City, Jovie Saulog ug John Flores nga pulos nangahas moilog sa trono.

Si Burnok mohimo sab og "free-style" isip halad niya sa bag-ong tie-up sa Keiz BJ Motors ug sa Phoenix Cyclomax Titan 4T.

Sama ni Uypitching, ang managsuong Ornopia nga sila si Ken-Ken ug Keizer manalipod sab sa ilang korona sa tagsa-tagsa ka dibisyon. Si Ken-Ken modepensa sa peewee, samtang ang iyang manghod si Keizer sa mini 65cc division. Ang ilang maguwang si Brylle, kinsa ikatulo sa mini 85cc dili mourong sa pakigbisog sa uban ang paglaum nga makarekober human maaksidente sa miaging leg.

Si Sarge Espina, ang first leg champion sa wanggits division mobalik sab sa aksiyon aron ilogon ang korona nga anaa karon sa mga kamot ni Renante Tigue.

Mopakita sab og aksiyon ang anak ni Saulog nga si Janelle ubos sa "ladies/bugno sila" division.

Uban pang kategoriya nga tigian naglakip sa local enduro, beginners open, beginners selection limited edition, beginners selection, intermediate, executive A, B and C ug ang "habal-habal."

"Nindot ni karon nga leg, kay mokuha ko'g duha ka "pit girls" sama sa gihimo sa gawas," matud pa ni race organizer ug Keiz BJ Motors big boss Siegfred Ornopia. Mopa-raffle sab ko og motor atol sa lumba.

Ang third leg nga gipahaom sa ikaunom nga anibersaryo sa Keiz BJ Motors niadtong Agosto 8, gipaluyohan ni Jonathan Cuyos ug sa Haojue Phils.

Suportado sab kini nilang Nanding Pedriano, Tommy Vega, Renante Tigue, Joy Flores, Erwin Agustino, Fiel Ornopia, Zigfred Duterte, Maternell Academy, Cebu Mufflerhaus, JCP Trucking, RMO Motorparts ug sa NC Racing. (BANATSPORTS)