Dynamic Power/Dynacast gisubhan og daog sa 16th SHAABAA

CEBU, Philippines - Gisubhan og daog ang Dynamic Power/Dynacast human makaipsot batok sa RDAK Transport/Edcom ni Regan King, 47-44 sa pagsugod sa 16th Sacred Heart-Ateneo Alumni Basketball Athletic Association (SHAABAA) didto sa Sacred Heart-Ateneo de Cebu campus sa barangay Canduman, Mandaue City.

Sa pasiunang duwa, yano kaayong mikulit og daog ang Mackent pinaagi sa paglubong sa Fiesta Cebuana, 63-46.

 Sikit kaayo ang engkuwentro sa duha ka kampo, ang Mackent miarangkada sa final period uban ang hugot nga depensa ubos sa pagtimon ni Kris Villamor kinsa maoy nangu sa kadaugan nga mipabuto og 13 puntos.

Sa laing mga duwa, ang Istorya.net milubong sab sa JAPFA sa iskor nga 52-40, samtang ang KIA/White Gold miratsada og 69-60 nga kadaugan batok sa San Remigio Beach Club.

Ang multiple MVP awardee nga si Dave Lim mibahog og 21 puntos aron pangulohan ang KIA/White Gold.

Yano sab kaayong gilubong sa ECO Blocks ang Filmon Hardware sa iskor nga 76-45, nga maoy highest winning margin sa kasamtangan sa ilang 31 puntos nga kadaugan.

Midaog sab ang Gaisano Capital batok sa Kunstof sa iskor nga 49-39.  - BANAT NEWS