Boksidor nakig-away og polis gipriso

CEBU, Philippines - Gidakop ang boksidor nga si Gabriel Rosado human siya gikatahong nakig-away og polis pipila lang ka oras human sa iyang kadaugan didto sa Atlantic City, New Jersey.

Midaog si Rosado sa main event sa miaging gabii didto sa Bally’s Casino hotel pinaagi sa TKO sulod sa upat ka rounds. Nagsaulog siya sa kadaugan uban ang iyang lima ka higala didto sa Bally Wild West Casino diin ang iyang grupo gikatahong naghimo og kasamok.

Usa ka casino security guard gikuyogan og polis nga unipormado nga si police officer Franco Sydnor ug mihangyo kang Rosado ug mga kauban sa pagbiya na lang sa casino mga alas 3:15 a.m. kagahapon.

Ang grupo ni Rosado nagkanayon ngadto kang Sydnor nga ila kining kulatahon sa dili pa moabot ang backup. Nakatawag hinoon si Sydnor ug backup apan gisukmag siya sa 25 anyos nga si Rosado ug nagisi ang iyang ngabil.

Ang ubang mga security guards miambit sa away matod pa sa Atlantic City police ug ang usa sa higala ni Rosado mibawi sa baton ni Sydnor apan nailog kini niya’g balik.

Miabot ang mga backup ni Sydnor sa nahimutangan sa away ug midakop kang Rosado kinsa gipasakaan og sumbong nga aggravated assault batok sa usa ka police hinungdan nga nahitabo ang riot.  - BANAT NEWS