MANILA, Philippines - Usa ka bayolenteng mensahe ang gipadangat ni Mexican lightweight Juan Manuel Marquez ngadto sa iyang karibal nga si Manny Pacquiao, dihang igo lang siyang nangayo og 47 segundos aron dispatsahon ang Colombian nga si Likar Ramos didto sa Mexico.
Isip pamatuod nga wala gihapon milurang ang iyang kusug, usa ka right straight ang gipatugpa ni Marquez ngadto ni Ramos kinsa naghayang nga wala nay panimuot ibabaw sa ring.
Si Marquez kinsa gianggaan usab og “Dinamita” mirehistro sa ika-39 niya nga knockout sa iyang 53 ka daog uban ang lima ka pilde, nagkanayon nga ang maong one-punch knockout maoy magpahigmata ni Pacquiao nga dili sayun ang atubangon niyang sangka karong Nobiyembre 12 didto sa Las Vegas .
“I will prepare well for Pacquiao and I want him to do that also. We can give the fans a war, its going to be a war,” matud pa ni Marquez sa examiner.com.
Gipakita usab sa Mehikano nga hinay-hinay na siyang naanad nga moaway sa mas bug-at nga timbang. Si Marquez mitimbang og 138 lbs. sa maong away, bug-at sa naandan niyang timbang sa lightweight division.
Si Pacquiao ug Marquez mag-abot sa catchweight nga 144 lbs. alang sa WBO welterweight title.
Atol sa press conference human sa away, gisul-ob usab ni Marquez ang usa ka T-shirt nga may marka “Pacquiao Your Next”.
Apan ang conditioning coach ni Pacquiao nga si Alex Ariza mibaliwala sa pagpanghudlat ni Marquez ug giklaro nga wala sila mahadlok sa gipakita sa Mehikano batok ni Ramos kinsa iyang gihulagway nga huyang nga kontra.
“There is no way he can scare Manny. He doesn’t fear anybody. Most kids have no fear factor but grow into it later on. Manny never got it. If they expect to scare Manny that’s not going to happen,” segun pa ni Ariza. - BANAT NEWS