Van System kampiyon sa Power Forty cagefest

CEBU, Philippines - Gilubong sa Van System ang FC Fortune, 114-106 aron sakmiton ang korona sa Power Forty Commissioner's Cup basketball tournament niadtong Martes didto sa Inayawan Sports Complex.

Sa pasiunang duwa, ang Park ‘N Go Bakeshop mihaon sab og daog dihang ilang gipilde ang Allyn Farm sa iskor nga 104-93 aron angkonon ang ikatulong puwesto.

Si Fernando Sumargo milansang og 31 puntos aron pangulohan ang Van System, samtang sila si Celso Cabaluna, Roger Cabatas, Mark Genzon, Romy Montuis ug Dome Labalan mi-iskor sab og double figures.

Ang FC Fortune gipangulohan nilang Gogo Fuentes ug Melvin Caumeran nga parehong miposte og 18 puntos. Si Teddy Ebrado miposte’g 15 puntos ug si Mario Tabar midugang og   12 puntos.

Sa laing bahin, si Michael Arias mikimada og 39 puntos alang sa Park 'N Go Bakeshop, gisundan ni Jingjing Rama nga adunay 23 puntos.

 Unom ka players sa Allyn Farm pulos mi-iskor og double figures pinangulohan ni Joel Cañete sa iyang 31 puntos.

Ang awarding ceremonies himuon karong Hulyo 30 atol sa ika-25 nga anibersaryo sa Power Forty. (BANATSPORTS)