FC Fortune, Van System mag-ilog titulo sa Power Forty

CEBU, Philippines - Gipukan sa FC Fortune ug ang Van System ang tagsa-tagsa nilang kaatbang aron moabante sa finals sa Power Forty Commissioner’s Cup didto sa Inayawan Sports Complex.

Unang miabante sa finals ang FC Fortune human makaipsot batok sa Park ‘N Go Bakeshop sa iskor nga 113-111, samtang ang Van System miangkon sa katapusang luna sa finals dihang midaog batok sa Allyn Farm, 89-85.

Ang mga pilderong Park ‘N Go ug Allyn Farm maoy magsangka alang sa ikatulong puwesto.

Mas balanse ang opensa sa FC Fortune tungod kay unom sa ilang players ang mibahog og double figures pinangulohan nilang Mario Tabar ug Gogo Fuentes nga miposa og 18 ug 17 puntos matag usa.

Si Melvin Caumeran midugang og 16 puntos ug si Teddy Ebrado miamot og 15 puntos, sila si Dodong Piezas ug Efren Mosqueda mi-iskor og 14 ug 12 puntos matag usa.

Si Michael Arias mirehistro og Power Forty record nga 52 puntos, samtang si Jingjing Rama mibahog og 22 puntos.

Sa laing bahin, si Fernando Sumargo mihakot og 29 puntos aron pangulohan ang Van System, samtang si Joel Cañete maoy nangu sa Allyn Farm sa iyang 38 puntos.