Tambalang Huey at Raja walang kupas, dinomina ang Cremona Challenger

MANILA, Philippines - Pinangatawanan nina Fil-Am Treat Huey at Indian partner Puray Raja ang pagiging top seed sa doubles competition ng Cremona Challenger nang mapag­harian ang kompetisyong nagtapos kamakailan.

Tatlong puntos lamang ang ibinigay nina Huey at Raja sa kabuuan ng sa­gupaan nila nina Tomasz Bednarek at Mateusz Kowalczyk ng Poland para makuha ang tagumpay.

Ito ang ikalawang pagkakataon na nanalo sina Huey at Raja bilang mag-partner dahil ang dalawa ay nagsanib din nang dominahin ang Toyota Challenger noong Nobyembre.

Pero para kay Huey, ito ang kanyang ikatlong panalo sa doubles sa taong ito matapos magbunga ang pakikipagtambal kay Vasek Pospisil ng Canada sa Rimouski Challenger sa Canada nitong Marso at sa Meknes Challenger sa Morocco kasama si Simone Vagnozzi ng Italy nitong Pebrero.

Ang paglahok na ito ni Huey sa men’s circuit ay upang makakuha ng mahahalagang puntos sa hanga­ring umangat sa rankings bukod sa gina­wang paghahanda para sa napipintong pangunguna uli sa Philippine Davis Cup team na lalaro sa New Zealand sa first round ng relegation tie sa Davis Cup Asia Oceania Zone Group L.

Mula Hulyo 8 hanggang 10 itinakda ang labanan sa hard court sa TSB Hub, Taranaka, New Zealand at ang mananalo ay aabante upang harapin ang Chinese, Taipei sa Setyembre upang madetermina kung sino ang mananatili sa Group I sa 2012.