CEBU, Philippines - Laing dungog ug kadaugan na usab ang naani ni eight-division world champion Manny Pacquiao human kini milampos pagpukan ni Shane Mosley pinaagi sa unanimous decision, apan bisan pa niini daghang Sugbuanon ang wala matagbaw sa resulta sa away.
Kagahapong adlawa liboan ka mga Sugbuanon ang nag-apong sa “pay-per view” sa maong away, apan pipila kanila ang nagbagul-bul ug wa makontento dihang wala mahitabo ang ilang giatangang knockout nga buhaton ni Pacquiao.
Mismo si Pacquiao miangkon nga dismayado usab siya sa dagan sa away ilabi na dihang gi-boo sila sa mga fans didto sa MGM Grand.
Hinuon, daling gidepensaan ni Top Rank CEO Bob Arum si Pacquiao ug gibasul niya si Mosley nga iyang gihulagway nga nagsige nalang og dagan human makatilaw og knockdown sa third round.
“I don’t know why they (fans) booed. But I interpreted it to the fact that they wanted Shane to engage more. Manny was on the offensive the whole fight,” matud pa ni Arum sa boxingscene.com.
Samtang sa iyang bahin, si ALA Promotions Vice President Dennis Canete mipasabot nga bisan pa sa kadominante ni Pacquiao atol sa away dako usab nga risgo kung magdali-dali siya og kuha sa knockout.
Sama usab niini ang panahom ni ALA welterweight prospect Mark Jason Melligen, apan wa niya kalikayi nga mosaway ni former three-division world champion nga si Mosley nga maoy iyang gibasul sa dili kaayo kulbahinam nga dagan sa away.
“Di ko ma-satisfy kung ako si Manny, pero unsaon taman nga hadlok man si Mosley makigsinukliay,” dugang pa ni Melligen.
Nakita usab ni Cebu City councilor Sylvan “Jack” Jakosalem nga gibuhat ni Pacquiao ang tanan aron mapatumba si Mosley, apan dili kini sayun nga buhaton ilabi na sa kataas sa kasinatian sa Amerikanong boksidor.
“Yes we were all expecting for a knockout, but let’s not take away things from Manny, iya gibuhat ang tanan to score a knockout pero lisud man sad if iya pugson kay kinahanglan man sad niya modepensa,” matud pa ni Jakosalem. - BANAT NEWS