Ave Maria nagmilagro na sab sa 5th Partners' Cup

CEBU, Philippines -  Nasumpo sa Ave Maria Sanctuary Park ang lain na sab untang gitawag og "endgame collapse" dihang naremati nila ang Prime Asia Pawnshop, 67-61 kagabii sa 5th CESAFI Partners' Cup didto sa Cebu Coliseum.

Sa kasamtangan, padayon pang nakumbati ang topseed ug walay pildeng Gaisano Capital batok sa no. 2 seed Lion Tiger Aerosol.

Sama sa naandan ang nasinati sa Ave Maria, nakasikit na sab ang ilang kaatbang ug nagtabla, 59-all pinaagi sa three-pointer ni Michael Cantonao sa nahabiling 1:24 sa fourth period.

Misukli si Renato Abing og kaugalingon niyang three-pointer aron hatagan ang Ave Maria og 62-59 nga bentaha ug napun-an og dos puntos ni Miguel Tabaloc alang sa 64-59 nga labaw sa nahabiling 40 segundos sa duwa.

Sa maong kadaugan, ang Ave Maria misaka ngadto sa ikatulong puwesto bitbit ang 4-5 nga baraha, samtang ang Prime Asia adunay 3-6 nga baraha.

Ang Ave Maria nilabaw og 10 puntos sa first quarter, 12-2 apan dali sab kaayo kining gipapas sa Prime Asia ug miilog pa sa labaw, 30-24 sa halftime.

Si Tabaloc, uban ni Banjo Capillar, Abulaiz Suliman ug Jason Nudalo maoy daku'g natabang pagpakgang sa rally sa Prime Asia atol sa third period.

Si Tabaloc maoy nangu sa Ave Maria sa iyang 12 puntos, samtang si Abing miamot og 10 puntos lakip na ang duha ka triples.

Bugtong si Cantonao lang ang mi-iskor og double figures alang sa Prime Asia sa iyang 17 puntos. (BANATSPORTS)