NLEX, Cobra sumampa sa liderato
Manila, Philippines - Nagbaga agad ang laro ng NLEX upang maagang maiwanan ang Black Water Elite tungo sa 81-62 panalo sa idinaos na PBA D-League Foundation Cup kahapon sa Arellano Gym sa Legarda.
Umalagwa sa 21-9 start ang Road Warriors at hindi na binigyan pa ng puwang ang Elite na makaporma nang magpatuloy ang mabangis na paglalaro nina Eric Salamat, Rogermar Menor, Clifford Hodge at Calvin Abueva tungo sa pagsungkit ng nangungunang 4-1 karta sa Group A.
May 19 puntos, kasama ang 4 of 7 shooting sa tres si Salamat bukod sa 5 assists, 2 steals at 2 rebounds habang si Menor ay naghatid pa ng 17 puntos.
Ang 6’6 na si Hodge ay mayroong 13 points at 8 rebounds habang 12 puntos at 14 boards naman ang ibinigay ni Abueva para sa kumpletong dominasyon ng Road Warriors sa Elite.
Sumalo naman ang Cobra Energy Drink sa liderato sa Group B nang malusutan ang naunang matikas na Café France, 74-67, sa unang laro.
Ang pambatong manlalaro ng Cobra na si Paul Lee ay nagtapos taglay ang 14 puntos, 11 rebounds at 5 assists habang 12 naman ang ibinigay pa ni Ken Acibar at ang Ironmen ay kasalo na ng pahingang Cebuana Lhuillier sa tuktok ng Group B sa 3-1 baraha. (ATAN)
Cobra Energy Drink 74--Sanga 17, Lee 14, Acibar 12, Baloran 10,Foronda 8, Hermosisima 7, Reyes 5, Eguilos 1, Mendoza 0.
Café France 67 -Rublico 20, Mabayo 12, Bulangis 11, Ponferada 6, Almario 5, Gallardo 4, Babad 2, Chua 2, Lobato 2, Magbitang 2, Banyas1, Garcia 0.
- Latest
- Trending
