Medellin mo-host sa CBA

CEBU, Philippines -  Ang mga duwa sa 1st M. Lhuillier Kwarta Padala-Cebu Basketball Association (MLKP-CBA) basketball tournament dad-on karong gabii didto sa lungsod sa Medellin.

Unang magsangka mao ang topseed Salazar Colleges of Science and Institute of Technology (SCSIT) Skyblazers ug Talisay City sa alas-6:30 sa gabii, sundan sa Ave Maria Sanctuary Park ug Asian College of Technology (ACT) Cyber Knights sa alas-8 sa gabii.

Ang Skyblazers laraw nga mobangon human masugamak ngadto sa Cyber Knights, 84-91 niadtong Domingo hinungdan sa pagkabugto sa ilang upat ka sunod-sunod nga daog.

Itugyan sa Skyblazers ang ilang duwa ngadto sa ilang 6-foot-8 center ug kanhi UV Lancer nga si Rino Berame.

Sa laing bahin, ang Ave Maria tinguha usab nga mopahamtang og laing kapildihan   sa Cyber Knights, kinsa niluhod atol sa first round sa elimination.

Ang Ave Maria magsalig gihapon sa ilang ex-pro tandem Jercules Tangkay ug Danny Aying. Atbangan kini nila ni Alano Caputolan, John Villaver, Bernie Ursal, Abe Galinato, Michael Luga, Randy Sevilla ug Ronaldo Bucao sa Cyber Knights. (BANATSPORTS)