SWU runners mihawud sa Run for a Child's Future

CEBU, Philippines -  Ang running partners nga sila si Mary Joy Tabal og John Philip Duenas sa Southwestern University (SWU) mao ang nanghawud sa Run For A Child’s Future kagahapon didto sa atubangan sa APM Mall.

Si Tabal misakmit og laing korona human mag-una sa 12k women’s run sa oras nga 48:58.96, samtang si Duenas maoy first placer sa men’s class sa oras nga 42:03.18.

Sayun ra kaayung gilabang ni Tabal ang finishline batok sa mga beteranang sila si Christy Sevilleno-Tutor (52:13.93) ug Madelyn Carter (53:21.74) sa ikaduha ug ikatulong luna.

Samtang sa pikas bahin, nahimong mga runnerups ni Duenas sila si Jordan Bacong (42:11.66) ug Adonis Singson (42:11.97).

Wa magmahay si Mary Grace delos Santos pagdagan sa mas mubo nga 6k run dihang iyang nasakmit ang korona sa oras nga 23:42.88 uban nila ni Joery Lee (25:40.53) ug Jhean Andrin (26:30.47) isip second ug third placer.

Ang top three placer sa men’s class mao sila si Bonifacio Monjas (20.22.10), Aldren Agang (20:38.30) ug Reprinel Banzon (20:53.05).

Midaog sa 3k run mao sila si Marky Lucero sa boys division ug Crizel Diongson sa girls category. (BANAT NEWS)