Ave Maria ampong modaog

CEBU, Philippines - Suwayan pagpakgang sa defending champion Ave Maria Sanctuary Park ang ilang tulo ka sunod-sunod nga pilde sa dihang ilang tilawan ang San Marino Corned Tuna karong gabii sa main game sa 5th CESAFI Partners' Cup diha sa Cebu Coliseum.

Sa pasiunang duwa, ang Winner Beef Loaf makigsangka batok sa way daog-daog nga Rose Aquarius sa alas-5:30 sa hapon sa dili pa magtigi ang Ave Maria ug San Marino.

Ang Ave Maria nagbitbit karon og 1-3 nga baraha ug tinguhang mokulit sa importante nilang daog karong gabii.

Human maka-eskapo batok sa Prime Asia, ang Ave Maria nga gibitoonan sa USJ-R Jaguars, napukan sa sunod nilang tulo ka duwa batok sa Gaisano Capital, Winner Beef Loaf ug Lion Tiger.

Ang Ave Maria ni team owner Raffy Senining moparada nilang Abulaiz Suliman, Jason Nudalo, Banjo Capillar, Midget dela Rama, Michael Bucayan ug Renzo Senining.

Samtang ang San Marino (2-3) magsalig sa trayanggulo nilang Rene Pacquiao, Eleazar Armecin ug Gil Wagas uban sa suporta nilang Joseph Nalos ug Bonifacio Guillena Jr.   - BANAT NEWS