CEBU, Philippines - Kapin sa 100 ka mga bata nga nagpangedaron og siyete anyos pataas ang misalmot sa usa ka bulan nga free basketball clinic nga gipasiugdahan ni ex-UV Lancers ug coach Danny Duran didto sa Ma. Gochan gym sa barangay Mambaling kagahapon.
Sa kadaghan sa mga bata nga gustong makakat-on og basketbol, gibahin ang clinic sa duha ka binyu -- matag Lunes, Miyerkules ug Biyernes didto sa Ma. Gochan gym ug matag Martes, Huwebes ug Sabado sa sitio ABBYA, Mambaling open court.
Pagahimuon kini sa alas-8 hangtod sa alas-10 sa buntag.
Gawas sa libreng basketball clinic, ang grupo ni konsehal Emier 'Bossing' Hamis mihimo sab og free vollleyball clinic nga himuon sa alas-10 sa buntag hangtod sa alas-12 sa udto.
Ang mga assistant trainors ni Duran mao silang Dodoy Cuarto, Bading Arante, Jude Verdida, Jerome Manubag, Joemarie Anjao, Michael Sumayang ug Joseph Lausa, samtang ang mga trainors sa volleyball clinic mao sila si Marlon Navarro (head trainor) ug mga assistants nga sila si Girlie Carpentero, Gay Ann Carpentero ug Johnny Oberes. (BANAT NEWS)