Ave Maria SP milubong sa Hotel Fortuna

CEBU, Philippines - Gilubong buhi sa Ave Maria Sanctuary Park ang Hotel Fortuna, 84-68 aron mag-solo sa ikaduhang dapit, samtang ang Talisay City mikulit og laing daog human ilang gipukan ang host Mandaue-Cebu Landmasters, 97-88 sa 1st M. Lhuillier Kwarta Padala-Cebu Basketball Association (MLKP-CBA) basketball tournament niadtong Domingo sa gabii didto sa Mandaue City Cultural and Sports Complex.

Uban sa ilang 4-1 nga baraha, ang Ave Maria nagpabilin sa ikaduhang puwesto ug dali kaayo silang nakarekober human sa ilang 89-93 nga kapildihan ngadto sa Salazar College of Science and Institute of Technology (SCSIT) Skyblazers atol sa gubat sa walay pildeng mga koponan niadtong Abril 3.

Sila si Enrico Llanto ug   ex-PBA cager Jercules Tangkay maoy nangu sa balanse kaayong opensa sa Ave Maria nga adunay 14 puntos matag usa.

Tanang lima ka sinaligang players sa nagsangki-ig nga Hotel Fortuna miposa unta og double figures, apan wala sab makaduwa kanila ang beteranong sentro nga si Marlon Basco kinsa mibalhin na ngadto sa Liga Pilipinas ug ingon man ang power forward nga si Eric Zanoria.

Si Clefford Maguate miposte og 15 puntos, si Gilbert Gallarde miposa'g 13 puntos, si Resty Getubig miamot og 12 puntos, Marco Sagmon mitampo'g 11 puntos ug si Jefferson Pria midugang og 10 puntos.

Sa laing bahin, mipakita na sab sa iyang katakus si Jayford Rodriguez, kinsa mibahog og 25 puntos aron pangulohan ang Talisay City, kinsa aduna nay 2-3 nga baraha.

Sila si Ferdinand Lusdoc ug Ranulfo Malinao midugang og 23 ug 21 puntos alang sa Talisay, kinsa mi-iskor sa labing una nilang daog batok sa mas paboritong Asian College of Technology (ACT) Cyber Knights, 85-81.

Ang Landmasters, kinsa midailos ngadto sa 1-4 uban sa Hotel Fortuna, gipangulohan nilang Kelvin Juliane ug Franklin Nailon nga nagkumboya og 43 puntos.

PUNTOS MATAG USA

Unang duwa:

Ave Maria (84) - Llanto 14, Tangkay 14, Delfino 10, Dacia 9, Aying 9, France 8, Gabas 6, Abellana 5, Cavan 4, Ponce 2, Cainglet 2

Hotel Fortuna (68) - Maguate 15, Gallarde 13, Getubig 12, Sagmon 11, Pria 10, Dinago 4, Tangarorang 3

Ikaduhang duwa:

Talisay City (97) - Rodriguez 25, Lusdoc 23, Malinao 21, Reyes 9, Belande 6, Mercader 4, Colegado 4, Sereño 4, Monaco 2

Mandaue-Cebu Landmasters (88) - Juliane 22, Nailon 21, Omolon 18, Abatayo 15, Tundag 9, Dennison 5, Samonte 2   - BANAT NEWS