Lawson mihimo'g 10 ka tres
CEBU, Philippines - Mipabuto og 10 ka three-pointers sa labing unang higayon si Ty Lawson aron mokulit og career-high 37 puntos alang sa Denver Nuggets kinsa milubong sa Minnesota Timberwolves sa iskor, 130-106 kagahapon sa nagpadayong duwa sa NBA didto sa Pepsi Center sa Denver, Colorado.
Sa sobra niyang kainit, na-outscore ni Lawson ang Timberwolves sa third quarter, 24-14.
Diriyot unta makahimo’g 10 of 10 sa iyang three-point attempt si Lawson aron mokulit og NBA record sa labing daghang sunod-sunod nga tirada gikan sa 3-point arc nga walay sipyat.
Si Latrell Sprewell mihimo’g 9 for 9 gikan sa three-point area alang sa New York Knicks atol sa ilang duwa batok sa Los Angeles Clippers niadtong 2003.
Hinoon, ang 19 ka three-pointers sa Denver nahimong usa ka franchise record.
“We just found our rhythm,” matod pa ni Lawson.
Ang kanhi career-high ni Lawson 28 puntos lang nga iyang nakulit tulo pa ka adlaw ang milabay dihang napilde sila sa Oklahoma City, 89-104.
Sa laing duwa, gipanitan sa Washington Wizards ang Atlanta Hawks, 115-83, midaog ang San Antonio batok sa Utah, 111-102, midaog ang Milwaukee batok Cleveland, 108-101 ug gibungkag sa Houston Rockets ang LA Clippers, 99-78. (GGM) (BANAT NEWS)
- Latest
- Trending
