Nietes mi-KO ni Vasquez sa round 1

CEBU, Philippines -  Bacolod City - Wala   paabta'g dugay ni WBO minimumweight champion Donnie 'Ahas' Nietes ang away ug gipakita niya nga andam na siya alang sa iyang damgo nga mamahimong two-division world champion pinaagi sa pagtumba sa Mehikanong si Armando 'Chiquita' Vasquez sa unang hugna sa main event sa "Pinoy Pride 5: Battle of Champions" kagabii didto sa nagsugwak nga St. La Salle Coliseum.

Wala pakyasa ni Nietes ang   saad niya ngadto sa iyang katagilungsod diin gipakita niya ang dakung kalamboan sa away ug kusog.

Ang impact sa kumo ni Nietes maoy nitay-og sa tibuok La Salle sa dihang si Vasquez nahagba sa canvass nga wala nay panimuot hinungdan nga gihunong ni referee Bruce McTavish ang away sa 2:26 sa unang round.

"Grabe ang hirap sa training at masarap manalo sa harap nilang (Negrenses) lahat," matud ni Nietes.

Si ALA Promotions president Michael Aldeguer mibutyag nga gumikan sa impresibong kadaugan, si Nietes, magpaabot na lang karon sa resulta sa WBO light flyweight title fight tali ni Columbian Jesus Geles ug Mexican Ramon Garcia Hirales karong Abril 30 didto sa Mexico. (BANATSPORTS)