Pinoy Pride 4 ihalad ni Salud

CEBU, Philippines - Gihalad sa ALA Promotions ug mga fighter niini ang nagsingabot nga “Pinoy Pride 4: Philippines vs World” boxing card sa mipanaw nga sports patron Rodrigo “Rudy” Salud.

Ang amahan sa ALA Boxing Gym nga si Antonio L. Aldeguer nagkanayon nga grabeng kaguol ang iyang gibati sa pagpanaw sa iyang higala ug mipadangat siya sa iyang pahasubo ngadto sa pamilya ni Salud.

“I feel the grief and sorrow of the Salud family’s loss. I have beautiful and wonderful memories of Rudy when we joined hands in managing Z Gorres’ career,” matud pa ni Aldeguer.

Si Salud kinsa usa sa mga founding Secretary General sa World Boxing Council nahimong suod sa ALA Gym human magsilbe siya nga usa sa co-manager ni kanhi bantamweight ug karon retired ALA superstar Z “The Dream” Gorres.

Sa iyang bahin, si Gorres namahayag nga dako siya og pasalamat ni Salud ug sa pamilya niini sa dakung tabang nga nabuhat niini ngadto kaniya.

Ang ALA Promotions muhatag sa ilang pasidungog ngadto ni Salud sa “Pinoy Pride 4” karong Marso 19 didto sa Waterfront Cebu City Hotel and Casino. (BANATSPORTS)