Blue nag-una sa BJMP basketball tournament

CEBU, Philippines - Nasakmit sa Blue nga girepresentahan sa regional office sa Bureau of Jail Management and Penology ang solong liderato human sila maka-ipsot batok sa Yellow-Cebu South All Star sa Toledo-BJMP sa iskor, 67-57 atol sa sangka sa mga way pildeng teams sa nagpadayong BJMP Sportsfest 2011 Inter-Color basketball tournament didto sa barangay Kalunasan covered court.

Kanunay untang naglabaw ang Yellow sulod sa tulo ka quarters ug mikulit sa labing daku nilang labaw nga 11 puntos sa pagsugod sa fourth period, 51-40 dihang nagmangtas silang Louie Remiticado, Elmar Yuson ug Francis Ellado.

Hinuon, daling nakarekober ang Blue nga mihimo’g mainitong rally sa paggiya ni skipper Louie Fajardo aron papason ang labaw.

Nailog sa Blue ang momentum pinaagi sa paglusad og 27-6 run sa third period dihang si Norven Cuyno milansang og 12 ka sunod-sunod nga puntos uban sa abag ni Fajardo, kinsa maoy topscorer sa koponan sa iyang 22 puntos. Si Cuyno mitampo og 17 puntos, samtang sila si Joel Bantaya ug Stephen Saornido parehong miamot og 10 puntos.

Ang Yellow-Toledo BJMP gipangulohan nilang Remeticado ug Yuson nga nagkumboya og 27 puntos.

Sa laing duwa, ang Red-Cebu City Jail Crusaders milubong sa Gray-BJMP North, 105-67 alang sa ikatulo nilang daog sud sa lima ka duwa.

Si Lloyd Tubog mibahog og 20 puntos alang sa Red, gisundan ni Lito Tarona nga adunay 14 puntos.

Ang Gray gipangulohan ni Celso Montalba, kinsa miburak og 23 puntos.  (BANATSPORTS)