Cebu City Darts Open gitakda

CEBU, Philippines - Gikatakdang magtige ang mga tang-ang darters sa nasud  sa ipahigayong Cebu City National Darts Open karong Marso 25 diha sa Yayoy’s Grills and Resto sa Capitol Site, ning siyudad.

Gipasiugdahan sa Cebu City Hall Employees Dart Association (CHEDA) ubos sa suporta sa kagamhanan sa siyudad sa Sugbu, ang torneyo gibuak ngadto sa unom ka kategoriya nga mao ang draw doubles, 4-person team, draw triples, youth singles, seniors singles ug open singles.

Gibana-banang moabot ngadto sa 200 darters lukop nasud ang mosalmot sa maong tournament nga naglakip sa mga rated na kaayo sama nila ni Boie Parfan III, Ian Perez, Boy Diongson ug Jojo Barellano nga maoy mga lig-ong contenders alang sa open singles.

Lakip sa out-of-town darters nga mosalmot naggikan sa Baguio, Cavite, Marikina, Ilo-ilo, Dipolog, Maasin, General Santos ug Tanjay.

Mokabat ngadto sa P200,000 ang gitaganang ganting salapi alang sa mga mananaog sa matag dibisyon. 

Ang registration fee nagkantidad og P250 alang sa draw doubles, draw triples ug seniors singles, samtang P500 sa open singles ug P1,200 sa 4-person team. Libre ang registration alang sa youth singles.

Alang sa dugang pang mga kasayoran, mahimong   motawag ni Bert Colong   sa   09287647681. (BANATSPORTS)