CEBU, Philippines - Ania na sa Sugbu ang mga dekalibreng foreign triathletes alang sa labing unang Xterra Philippines Triathlon Championship karong Domingo didto sa Amara sa Lilo-an.
Naghinam-hinam nga makiglumba sa labing dakung off-road triathlon nga mahitabo dinhi sa nasud mao ang reigning Xterra women champion nga si Renata Bucher sa Switzerland, Sam Gardner sa UK, Amerikanong si Shonny Vanlandingham ug mga pambato sa Austria nga sila si Janet Clark ug Carina Wasle.
Laing 20 ka mga langyaw ang sayo usab nga miabot dinhi sa nasud aron masinati ang klima.
Mokabat ngadto sa $15,000 ang gitaganang ganti alang sa mga mananaog sa maong kompetisyon, samtang P120,000 alang sa mga top finishers sa All- Filipino category.
Gawas pa niini, ang top performers sa age-group level makaangkon og kahigayonan nga moduwa sa Xterra World Championships sa Makena, Maui sa Hawaii sa Oktubre 23. (BANATSPORTS)