Ornopia mitanom 5 ka tres
CEBU, Philippines - Hapit mausbi ang unom ka triples nga giugbok ni Siegfred Ornopia sa Keiz BJ Motorsales nga midemolis sa Dedon, 63-49 sa Game-2 sa ilang “best-of-three” semifinals sa 1st Keiz BJ Inter-company basketball tournament niadtong Miyerkules sa gabii didto sa Barangay Tabok gym sa dakbayan sa Mandaue.
Ang team manager sa Keiz BJ ug 3-point king nga si Ornopia mitanom og lima ka triples alang sa iyang 15 puntos, apan ang idlas nga si Jervie Ermac maoy nangulo sa kadaugan pinaagi sa iyang game-high 26 puntos. Si Athan Ariza miani sab og double figures pinaagi sa iyang 11 puntos.
Sama sa nangagi nilang mga duwa, gikontrolar gihapon sa tang-ang Keiz BJ ang aksiyon gikan pagsugod hangtod nahuman diin miposte kini’g 12 puntos nga abante human sa 3-point shot ni Simoy Manija sa second period sa wala nila taposa ang first half, 32-24.
Ug sama usab sa nakagamot nga kahoy, lisud na sab ugkaton ang double-digits nga labaw sa Keiz BJ gumikan kay misiaw man si Ornopia, kinsa mibagdok og tulo ka triples sa third period aron moposte og 51-32 paingon sa final period nga maoy barometro paglubong sa Dedon nga gipangulohan ni Raul Franconas kinsa milarot og 13 puntos. Sila si Jason Canawa ug Rodel Alcotin misansan og nuybe puntos matag usa alang sa napalagpot nga Dedon. (BANATSPORTS)
- Latest
- Trending
