MANILA, Philippines – Masaya na ang Philippine Taekwondo Association (PTA) kung mapapanatili nilaang isang ginto na napanalunan sa poomsae event sa Laos SEA Games sa gaganaping 26th SEA Games sa Indonesia.
Sa pagdalo ni national poomsae coach Igor Mella, ang Pilipinas at Vietnam pa rin ang malakas sa nasabing event pero patuloy din ang paghusay ng mga manlalaro sa ibang SEA countries kung kaya’t naniniwala siyang mas mahigpit ang tagisang magaganap sa Indonesia.
Bukod pa ito sa katotohanang ang ibang sinasandalang manlalaro ng poomsae sa bansa ay walang panahon na maibigay sa pagsasanay dahil sa pagiging abala sa trabaho o pag-aaral.
Ang Pilipinas ay tiningala sa poomsae o form discipline ng taekwondo dahil ang women’s team ay nagkampeon sa World Poomsae Championship noong 2009 habang sa sumunod na taon ay ang kalalakihan naman ang hinirang bilang world champion.
Sina Rani Ann Ortega, Janice Lagman at Camille Alarilla ang nagkampeon noong 2009 sa Cairo Egypt at sila ay nasa pool ng manlalaro pa. Ang men’s team na nagkampeon noong nakaraang taon sa Tashkent,Uzbekistan noong nakaraang taon ay sina Jean Pierre Sabido, Brian Sabido at Anthony Matias.
Si Brian ay abala na sa kanyang trabaho bilang isang landscape architect at hindi na nakakapag-ensayo kaya’t posibleng mabuwag na ang koponan sa kalalakihan.