CEBU, Philippines - Usa ka solidong left hook ang gibuhian ni Marco Demecillo Singwangcha nga nakapatikuko ni Ricardo Roa sa ilang sangka niadtong miaging gabii didto sa Dalaguete Sports Complex, Dalaguete, Cebu.
Ang undefeated Philippine Boxing Federation (PBF) super flyweight champion nga si Singwangcha mibuhi og mga kombinasyon, apan ang iyang bangis nga hook ngadto sa lawas maoy nakapasurender ni Roa sa first round.
Sa laing bahin, midaog sab pinaagi sa knockout si Marlon Tapales Singwangcha dihang iyang gipahayang si Charlie Cabilla sud lang sa 2:46 sa opening round human maigo sa iyang kalit nga right uppercut.
Si T.I Yamagati Aguelo milampos pagdepensa sa iyang PBF featherweight title human midaog pinaagi sa 10-round unanimous decision.
Tulo ka mga hurado mi-iskor og 96-93, 97-92 ug 97-92 pabor ni Aguelo.
Lain pa nga mga midaog mao sila si Lobert Bayo, Jerich Chavez Singwangcha, Bobbie Singwangcha ug Noel Aldemita.
Samtang nagtabla ang away nilang Henry Acha ug Marlou Sandoval. (BANAT NEWS)